Врз основа на „зголемената економска извозна моќ“ и „точка која претставува влез кон европските пазари“ Македонија влегува во азиско-пацифичкиот регион, воспоствувајќи трговски врски со партнери на Филипините, пишува тамошниот „Business Mirror“ од Манила.
Извршниот директор на Македонскиот трговски совет за Азија и Пацификот, Владимир Кофчегарски, неодамна присуствуваше на Меѓународниот саем на храна во Манила, при што се сретна со претставниците на тамошната индустрија и на владата. За оваа организација се вели дека е „независен, непартиски „think tank“, кој треба да го создаде и промовира македонскиот бренд во регионот на Азија и Пацификот“.
Кофчегарски истакнал дека филипинската економија расте 6,6 отсто годишно, раст кој е воден од зголемената популација од 98 милиони жители, што создава растечка побарувачка за увоз на храна и пијалоци, како и други производи за широка потрошувачка, кои достигуваат 1 милијарда долари годишно.
– Филипините повеќе не се болниот човек на Источна Азија, туку растечки тигар – изјавил Кофчегарски.
Откако го анализирал овој пазар во период од една година, тој смета дека е вистинско време за влез, зашто предвидува дека Филипините ќе остварат двоцифрен раст во следните 5 години.
– Ова е пазар од речиси 100 милиони жители со голема доверба на потрошувачите и многу млада и динамична популација, која се стреми кон увозни и готови прехранбени производи што Македонија може да ги понуди – вели тој.
Македонија има постигнато многу од својата независност во 1991 година, откако веќе ја докажа својата „извозна моќ“ преку трговските односи со Германија, Италија, САД, Русија и Турција, пишува весникот, додавајќи дека азиските пазари се очигледен следен чекор.
– Европа е многу мал пазар за нас – објаснува Кофчегарски. „Ние не можеме да дозволиме да зависиме од пазар од 650 милиони лица, споредено со можни 4 милијарди“, додава тој.
Кофчегарски вели и дека „нашиот извоз го зацементира нашето место во Европа, но Македонија е способна да влезе и на поголеми пазари“.
– Ние веќе се сретнавме со клучните играчи на IfeX саемот во Манила за да ги промовираме македонските извозни производи со очекување да ги видиме на полиците на овдешните супермаркети пред крајот на годината. Исто така, како дел од нашата двонасочна економска програма, ќе ја понудиме нашата логистика и експертиза преку користење на македонската централно-европска локација како евтина влезна точка за филипинскиот извоз во Европа – вели Кофчегарски.