Пристигнаа првите навивачи на стадионот „Лоро Боричи“ во Скадар, Албанија. Два автобуси со навивачи од навивачката група „Мајмуни“ од Прилеп, предмалку влегоа и се сместија на трибините, во очекување на натпреварот меѓу фудбалските репрезентации на Македонија и Албанија.
Од Македонија се очекува да дојдат околу 600 навивачи од Македонија, за да го гледаат првиот натпревар од квалификациите за Светското првенство во Русија. Половина од нив тргнаа со автобуси од Прилеп, Куманово и Скопје, за да и дадат поддршка на македонската репрезентација, а другата поголема половина се од навивачката група „Балисти“ на Шкендија, кои утринава тргнаа од Тетово за да навиваат за домашната репрезентација.
Натпреварот во Скадар е со почеток од 20.45 часот. Капацитетот на стадионот од 16.000 места е распродаден, а за обезбедување се ангажирани над 900 полицајци. На вечерашниот меч е најавено и присуство на албанскиот премиер Еди Рама.