Фирми од Србија ги пренесоа своите иновативни идеи на компании од Македонија во рамки на иницијативата Отворен Балкан.
Револуционерен уред за мерење на срцевиот ритам (ЕКГ), развиен од спрската компанија „Свездрав решења“ им е достапен на граѓаните на Северна Македонија преку соработката со домашната компанија „Гордиан Системс“. Се работи за мини уред, кој може да се користи во домашни услови, каде пациентите преку мобилна апликација, можат да го контролираат своето здравје и истовремено да бидат во постојана врска со избраниот лекар специјалист кој го добива резултатот од мерењето и кажува дали пациентот треба да дојде на дополнителни испитувања.
„Овој уред ни овозможува да го држиме нашето здравје под контрола, но не мора постојано да одиме на лекар, да бараме термин за контрола, значи да го избегнеме непотребото одење по здравствени установи во време на пандемија. За сега, ние ваков уред им дадовме на користење на лекари интернисти во Геронтолошкиот завод во Скопје, на Здружението ‘Во мојот свет’ како и на повеќе доктори кардиолози“, рече за НоваТВ Тони Бацаровски од компанијата „Гордиан Системс“.
Уредот чини 30 евра, но за сега е достепен само со нарачка преку веб страницата на српската компанија „Свездрав решења“.
Шест иновативни проекти, развиени од српски компании со финансиска поддршка на Владата на Србија, беа дел од проектот за трансфер на знаења и иновативни решенија, како дел од соработката помеѓу компании од Србија, Северна Македонија и Албанија во рамки на иницијативата „Отворен Балкан“, а со цел ублажување на социо-економските последици од Ковид пандемијата.
Амбасадорката на Србија во Северна Македонија. Невена Јовановиќ рече дека Отворен Балкан е револуционерна идеја за добра регионална соработка.
„Оваа иницијатива покажува како Отворен Балкан за многу кратко време почна да се имплементира во пракса. Не само дека подршката која компаниите од Србија им ја даваат на компаниите во Северна Македонија и во Албанија ја подобрува нашата соработка, но сигурна сум дека ова ќе ги отвори вратите за идна соработка помеѓу нашите компании со крајна цел подобрување на квалитетот на нашите економии , но и подобрување на стандардот на граѓаните“, рече амбасадорката Јовановиќ.
За Нола Исмајлоска од иницијативата „Отворен Балкан“ веќе се видливи резултатите од соработката.
„Нашите компании полесно ги минуваат граничните рампи, без долги процедури и без задржувања. Направивме зелени коридори со цел протокот на стоки да тече непречено. Дополнително, потпишавме и договори за слободен пазар на трудот“, рече Исмајлоска и додаде дека преку соработката овозможиле подобри услови за постојните, но и за сите идни инвеститори.
Спроведувањето на иновативни решенија како одговор на кризата предизвикана од Ковид-19 пандемијата во Северна Македонија и во Албанија, е поддржано во рамки на проектот „Договор за развојни услуги – рамка за забрзување на ЦОР“ финансиран од Владата на Србија и спроведен од Програмата за развој ан ОН (УНДП).
(Б.Божиновска)