Министерот за економија на Обединетите Арапски Емирати (ОАЕ), Султан бин Саеед Ал Мансури, ќе се сретне со македонскиот премиер Никола Груевски за време на официјалната посета на Македонија, најави Khaleej Times завчера, од Абу Даби, додека денеска весникот потврди дека средбата е остварена (текст до фотографија горе).
Поздравувајќи ја делегацијата на ОАЕ, предводена од Ал Мансури, македонскиот премиер ги пофалил мудрите надворешни политики на Емиратите, заинтересираноста за отворање кон светот, како и воспоставувањето партнерства, кои ја рефлектираат блиската меѓународна соработка и понатамошното засилување на економските, трговските и инвестициските односи со остатокот на светот.
Министерот Ал Мансури, пак, рекол дека средбата е дел од напорите да се промовираат односите на ОАЕ и Македонија. Двете страни се договориле да започнат, во најбрз можен рок, преговори за договор за избегнување на двојното оданочување и заштита и промоција на инвестициите.
Уште во саботата, друг весник од земјите на Персискиот залив Gulf News извести дека Ал Мансури ќе предводи делегација која во официјална посета ќе ги посети Македонија и Косово.
Минситерот за економија на ОАЕ, во официјална изјава пред тргнувањето истакнал дека тридневната посета има за цел да ја прошири соработката меѓу ОАЕ и двете земји, барајќи можности за инвестирање и охрабрувајќи го приватниот сектор и деловната заедница да иницираат заеднички проекти за засилување на економскиот раст во трите земји.
Секторите како земјоделството и индустријата на храна особено се таргетирани од ОАЕ со оглед на тоа што оваа земја има за цел да го засили снабдувањето со храна, вели Ал Мансури.
Во делегацијата со министерот Ал Мансури присуствувале и високи претставници од Министерството за економија на ОАЕ, компанијата Dubai Airports, S.S. Lootah Group, Agriculture и други.
За оваа официјална посета на министерот за економија на Обединетите Арапски Емирати во Македонија и за неговата средба со премиерот Груевски немаше ни збор, ниту пак било какво соопштение.