Поради враќање на сила на итните владини мерки, затоа што два дена по ред, две станици покажуваат загадување повисоко од дозволениот праг, се враќа и бесплатниот градски превоз се до намалување на загадувањето, информираше денеска градоначалникот на Скопје, ПЕтре Шилегов.
Воедно ќе следи и прекин на сите градежни активности на градилиштата, интезивно миење на градските улици, зајакнати инспекциски надзори како и ограничување на обуките на автошколите.
Градоначалникот на Скопје, Петре Шилегов на прес-конференција апелираше да не се користат возилата без потреба и граѓаните да се организираат и да користат заеднички превоз, но и за затоплување да не се користат отпадни материјали, туку само суво дрво.
„Борбата против аерозагадувањето бара поголема вклученост од сите нас, бидејќи сите го дишеме истиот воздух“, рече Шилегов апелирајќи да се почитуваат мерките за да има почист воздух.
Автобусите во наредниот период се додека се на сила вонредните мерки за намалување на загадувањето, ќе сообраќаат зачестено, а превозот ќе биде бесплатен.
Скопскиот градоначалник се обврза дека и самиот со личен пример да придонесе за почитување на мерките, и рече дека на работа ќе доаѓа пеш или со градски превоз, но на располагање го има и електричното возило кое го поседува градот.
Службените возила на градот ќе ги користат само од градскиот инспекторат.