Почина уште едно лице од повредените во експлозијата на плинската боца што се случи пред две недели во кумановското село Романовце. Станува збор за 55-годишен маж кој, како што потврдија од Клиниката за пластична хирургија, починал утрово во шест часот на Клиниката за неврохирургија. Со тоа, бројот на жртви во несреќата се искачи на седум.
„Лицето почина во 06 часот утрово на интензивна нега на Неврохирургија. Лицето претходно се лекувало на Клиниката за пластична хирургија, но поради сериозност на повредите беше префрлен на интензивна нега на Неврохирургија“, изјави директорката на Клиниката за пластична хируругија, Софија Пејкова.
Починатото лице било со над 45 проценти зафатеност на телото со изгореници. Зафатени биле и дишните патишта, а имал и инхалациони изгореници. Од несреќата во Романовце, се лекуваат уште три лица во старата Градска болница.
Директорот на болницата, Љубен Арсенков информира дека во најсериозна состојба е 31-годишно лице. Пациентот е стабилен, но сè уште е во животна опасност и поврзан на апарати за дишење. Во оваа болница е хоспитализирана и бремената жена чија состојба е значително подобрена и префрлена е на одделение. Хоспитализираното десетгодишото дете е со висок процент на изгореници, но во релативно стабилна состојба.
Претходно починаа две жени, едната на 63-годишна возраст, а другата 36-годишна и еден маж на 58 годишна возраст. На местото на несреќата што се случи на 23 февруари загинаа три деца на осум, девет и 11 годишна возраст.