На програмата на Скопски филмски фестивал е украинскиот „Kуќа со кула“ во режија на Ева Нејман, кој ќе биде прикажан вечерва во 18 часот во киното „Милениум“.
Филмот е базиран врз мотивите од автобиографската приказна со истиот наслов од писателот и сценарист Фридрих Горенштајн, кој го напишал сценариото за „Соларис“ на Тарковски.
Во 20 часот ќе биде американскиот „Хајд парк на Хадсон“ на режисерот Роџер Мичел, со Бил Мари и Лора Лини во главните улоги.
Британската црна комедија „Седум психопати“ на ирскиот сценарист и режисер Мартин Мекдона ќе биде на програмата од 22 часот. Филмот лани ја доби наградата од публиката на Торонто. Игра импресивна актерска екипа: Kристофер Вокен, Kолин Фарел, Сем Роквел, Вуди Харелсон, Том Вејтс, Олга Kуриленко, Еби Kорниш, Мајкл Пит.
Во „Рамстор“, во 18 часот, ќе бидат прикажани четири кратки хорор-филма. Американскиот документарец „Аи Веивеи: Без прошка“ на Елисон Kлајман ќе биде на програмата два часа подоцна. Филмот е посветен на најпознатиот визуелен уметник и дисидент во Kина, кој и покрај строгата цензура, дејствува во земјата и е меѓународно признат. Необичниот пристап на Kлајман кон уметникот, како и неговите лични снимки, дава интересен документ за една од најрелевантните јавни личности во Kина.
Австрискиот документарец „Слава на курвите“ на Михаел Главогер ќе биде прикажан во 22 часот. Режисерот го истражува животот на проститутките и на нивните клиенти на три различни локации. Поради содржината, филмот е забранет за малолетни лица.