Седум судии се разрешени во минатата година, од кои петмина поради несовесно и нестручно вршење на судиската функција, а двајца сториле потешка дисциплинска повреда, информира Павлина Црвенковска, претседателка на Судскиот совет.
Во текот на 2021 биле поднесени 90 барања за утврдување одговорност за судија или претседател на суд, односно се барало да се утврди одговорност за 142 судии, а судскиот совет постапувал по 699 преставки.
Црвенковска рече дека пред неколку седници имало дисциплински мерки за еден судија и за еден претседател кои се казнети со намалување на платите во рок од шест месеци. Претседателката на Судскиот совет не го откри идентитетот на разрешените судии.
Судовите во јануари 2021 година останале со нерешени 99.954 предмети, примиле во работа нови 564.899 предмети, имале вкупно во работа 664.493 предмети. Од овој фонд на предмети решени се 567.155 предмети, а останале нерешени 97.338 предмети. Според наведените податоци, судовите во 2021 година успеале да го совладаат приливот на предмети и го намалиле за 2.256 предмети.
Во текот на 2021 година за функционирањето на Судскиот совет се потрошени 42,5 милиони денари. Во претходната 2020 година биле потрошени 40,5 милиони денари, од кои 99 посто е реализација на судскиот буџет, 80 отсто биле пари за плати и за надоместоци, за стоки и услуги 14,03 отсто, и за капитални инвестиции 3,58
Претседателката на Судскиот совет зборуваше и за методологијата за квалитативно оценување која е целосно нов концепт за оценување на судиите и претседателите на судовите.
– Методологијата е веќе инсталирана во АКМИС системот и започнато е со нејзина примена. Судскиот совет пред два дена на седнца ја избра Комисијата за рангирање на кандидати и донесе и правилник по кој ќе се врши оценувањето, објасни Црвенковска.
Таа смета дека секој судија ќе биде реално оценет и согласно неговите оцени ќе напредува во кариерата, а доколку за еден судија две последователни оценки се негативни тогаш тој треба да биде разрешен.
– Методологијата со индикатори за сложеност на предметите не е се уште имплементирана во АКМИС системот, правиме напори со невладиниот сектор, со компанијата задолжена за АКМИС системот да ја имплементираме. Со оваа методологија ќе се утврдува сложеноста на предметите, однапред утврдената сложеност во моментот кога судијата ќе го прими предметот, тоа ќе значи посоодветна распределба бидејќи ќе влијае директно на нормата која штио треба да ја сработи секој судија месечно и доколку има посложени предмети тогаш автоматски нормата ќе му биде намалена, додаде Црвенковска.
С.М.