Откако на 29-ти мај годинава ја доби трката за претседател на Светската фудбалска организација по петти пат, 79-годишниот Сеп Блатер по само четири дена поднесе оставка од позицијата на која се наоѓа 17 години поради скандалот со корупција кој ја зафати ФИФА.
– Длабоко размислував за моето претседателство и 40-те години кои ги поминав во ФИФА. Ја сакам организацијата повеќе од се’ друго и оставката ја давам за сечие добро. Се кандидирав за претседател за доброто на фудбалот, рече Блатер денеска на прес-конференцијата организирана за многу краток период.
Тој потенцираше дека неговиот мандат не го поддржуваат сите и затоа ќе бара нов состанок.
– Ќе организирам вонреден конгрес каде што ќе се бара замена за мојата позиција. Јас нема да се кандидирам. Јас ќе се фокусирам на длабоки реформи, бидејки многу години зборуваме за нив а никогаш не се доволни, напомена 79-годишниот претседател на ФИФА во заминување.
Блатер на чело на организацијата е од 1998 година.
Неодамнешниот конгрес на ФИФА беше во сенка на апсењата на седумина високи претставници во хотел во Цирих, а вкупно 14 беа приведени од швајцарската полиција под сомнение за корупција, измама, рекетарство и перење на пари.
Истиот ден, Швајцарците најавија дека ќе започнат постапка за одлуките Светското првенство во фудбал во 2018 и 2022 година да се играат во Русија, односно Катар.
Изборите за нов претседател ќе бидат организирани помеѓу декември и март следната година.