Наместо 45 дена, важноста на сертификатот за прележан Ковид-19 да трае 180 дена – ваква предлог одлука донеле членовите на Комисијата за заразни болести на денешниот состанок.
Портпаролот на Комисијата Злате Мехмедовиќ, вели дека со оваа одлука се прави усогласување на траењето на сертификатите за Ковид 19 во светот и во Северна Македонија со која важноста на сертификатот да се продолжи до шест месеци, или 180 дена, од денот на добиен позитивен ПЦР тест.
Предлогот ќе оди кај министерот за здравство и кај Главниот кризен штаб во Владата, по што ќе биде донесена и конечната одлука.
Сертификатот за прележан ковид, исто како и сертификатот за вакцинација, е официјален документ со кој лицата што го прележале корона вирусот ќе можат да ги извршуваат секојдневните обврски, но и да патуваат во странство
Помеѓу се уште актуелните мерки на Владата, серфитикатот за прележан Ковид-19 е потребен за влез во угостителски објекти и молови, но и за премин преку граница.
Членовите на Комисијата направиле и анализа на сите смртни случаи поврзани со компликации од Ковид-19, согласно податоците објавени од Институтот за јавно здравје. Анализата се однесува на сите случаи на хоспитализација и смрт од Ковид -19 во периодот од 1ви до 31ви јануари 2022 година.
„Анализата покажува дека во анализираниот париод, само шест лица со примена трета или бустер доза завршиле со смртен исход, сите смртни случаи имале дополнителни болести, односно коморбидитети, како што се дијабетес, кардио-васкуларни заболувања, карцином и обезност“, вели доктор Мехмедовиќ.
Третата препорака се однесува за лекување на пациенти со Ковид-19 и тие се изработени од работна група при Министерството за здравство и од Катедрата за семејна медицина во соработка со амтичните лекари. Препораката е тие да бидат објавени на сајтот на МЗ, на Лекарската комора и да бидат испратени до матичните лекари како и ковид центрите со цел да се олесни достапноста и примената на овие протоколи.
„И последната препорака од денешниот состанок се однесува за учениците. Дел од достапните тестови кои се во владение на Министерството за здравство ќе се користат за проценка на преносливоста на вирусот во школски услови, а дел ќе се користат за тестирање на изложените ученици во одделенијата каде што имало позитивен случај, да може да се тестираат и доколку тестот биде негативен тие ученици да продолжат со настава“, рече Мехмедовиќ и додаде дека до Комисијата досега не пристигнало барање од родители за неносење на маски во училиште, но рече дека согласно препораките на СЗО, сите деца кои посетуваат настава со физичко присуство мора да носат заштитни маски.
Во однос на укинување на сертификатите за вакцинација, по примерот на некои западно-европски земји, доктор Мехмедовиќ вели дека се уште е рано да се размислува во таа насока, бидејќи кај нас опфатот на вакцинација е многу мал или едвај 40 отсто во споредба со некои земји во Европа каде се имунизирани над 85 посто од граѓаните.
Комисијата за заразни болести, заседава во проширен состав откако министерот за здравство, Беким Сали пред дестина дена ги освежи членовите на Комисијата со нови имиња од стручната фела.
(Б.Б.)