Сестрата на вооружениот напаѓач е меѓу загинатите во Дејтон, Охајо.
Конор Бетс (24) ја убил својата сестра Меган Бетс (22), заедно со уште осум други, пред да биде застрелан од полицијата, соопштија властите.
Најмалку 27 други се повредени. Досега, полицијата одби да коментира за можниот мотив за нападот.
Трагедијата се случи на помалку од 24 часа по ужасното пукање во Валмарт во Ел Пасо, Тексас. Дваесет лица загинаа во тој масакр, а уште 26 повредени, додека 21-годишниот убиец беше приведен.
Напаѓачот во Охајо почнал да пука во 1 часот и 5 минути по полноќ со фреквенетен ноќен живот – театри, кафулиња и ресторани. За помалку од една минута тој бил застрелан.
„Ова е ужасно тажен ден за нашиот град, но јас сум воодушевен од брзиот одговор на полицијата во Дејтон која спаси буквално стотици животи“, рече градоначалничката на Дејтон. Меѓу загинатите има луѓе од различни возрасти, пол и раса.
Убиецот носел панцир и бил вооружен со пушка со калибар 223 и со дополнителна муниција за да биде поубиствена. Тој уби 9 лица и рани 27 за помалку од една минута.
Претседателот Доналд Трамп по пукањата во Охајо и Тексас во неделата, напиша „Бог да ги благослови луѓето на Ел Пасо Тексас. Бог да ги благослови луѓето од Дејтон, Охајо “.
Сенаторката од Масачусетс, Елизабет Ворен реплицираше на неговиот твит.
„Очајна сум по убиствата на 29 лица овој викенд во Ел Пасо и Дејтон – и сите други животи кои ги губиме секој ден поради бесмислено насилство со оружје. Треба да преземеме итни активности за да се стави крај на епидемијата на насилството со оружје“ напиша Ворен.