Северна Кореја денеска и официјално ја отфрли резолуцијата на Советот за безбедност при Обединетите нации со која се бара запирање на нејзината програма за развој на нуклеарно оружје, најавувајќи спротиставување на меѓународните санкции и продолжување на настојувањата да стане нуклеарно вооружена држава.
Советот за безбедност во петокот едногласно наметна нови санкции за Северна Кореја, заострувајќи ги финансиските ограничувања и контрола на транспортот на забранетите товари.
Кина, единствениот голем сојузник на комунистичкиот режим во Пјонгјанг, сака санкциите во целост да бидат спроведувани. Санкциите се дизајнирани слично на оние коишто се применуваат за Иран, за кои западните функционери тврдат дека се изненадувачки ефикасни.
Ова е петта резолуција од 2006 година насочена на запирањето на нуклеарната и ракетна програма на Северна Кореја, што се совпаѓа со големата ескалација на тензиите на Корејскиот полуостров по третата нуклеарна проба на Пјонгјанг изведена на 12-ти февруари годинава.
„Демократска Народна Република Кореја, како што тоа го правеше во минатото, жестоко тја осудува и целосно ја отфрла ткн ‘резолуција за санкциите‘ против ДНР Кореја, како производ на непријателската американска политика кон неа”, изјави портпаролот на севернокорејското министерство за надворешни работи во соопштение кое го пренесе официјалната агенција KCNA.
„Светот јасно ќе ги види зацврстувањата на трајната позиција на ДНР Кореја како држава којашто поседува нуклеарно оружје и лансира сателити, како резултат на американското поттикнување на Советот за безбедност на ОН за донесувањето на резолуцијата”, се додава во цитираното соопштение.
САД претходно во петокот навечер ја предупредија Северна Кореја дека нема ништо да постигне повторувајќи ги заканите и провокативните акции, туку само ќе се турне самата себеси подлабоко во меѓународна изолација.
„САД и нашите сојузници се подготвени да ја решаваат секоја закана и вистинска ситуација која се случува во светот. Ние сме свесни што се случува. Имаме важни партнерства во тој дел од светот”, изјави во петокот американскиот министер за одбрана, Чак Хејгел.
Пренебрегнувајќи ги меѓународните предупредувања, Северна Кореја во февруари ја изврши својата трета нуклеарна проба, детонирајќи направа со поголема ударна моќ од употребената претходно при втората нуклеарна проба од 2009 година. Исто така, тврди дека остварила напредок и во минијатуризирањето на атомската бомба, што е клучен предуслов при изработка на боева глава за балистичките проектили.
Северна Кореја ги обвини САД дека ги користат воените вежби во соседна Јужна Кореја како провокација за започнување нуклеарна војна и во вторникот објави дека се повлекува од примирјето со Вашингтон, со кое беа завршени непријателствата во Корејската војна која траеше од 1950 до 1953 година.
Двете Кореи технички и натаму се во војна, бидејќи нивната тригодишна војна заврши со примирје а не со формален мировен договор.
Во моментов силите на Јужна Кореја и на САД заеднички спроведуваат големи воени маневри коишто ќе траат до крајот на април. Северна Кореја, исто така, подготвува големи воени вежби кои ќе се одвиваат на целата територија на земјата