Тимот на ПСЖ во вистински момент потврди зошто го гледаат за најголем ривал на Реал Мадрид за титулата во Лигата на шампиони за оваа сезона. „Светците“ демонстрираа страшна фудалска моќ во дербито на вечерта што на своја кожа ја почувствуваа играчите на Баерн Минхен. Кавани и Нејмар ги закопаа воените секири, клупскиот интерес го ставија над личниот, па вратената синергија во соблекувалната се преслика на терен и продуцира убедлив триумф на парижани над Баварците со 3:0.
Дани Алвес прв ја проби одбраната на Германците и веќе во втората минута го принуди Улрих на капитулација. Уругваецот се додаде во листата на стрелци во 31 минута, а 222 милиона евра вредниот Бразилец ја докрајчи четата на Карло Анчелоти во 63 минута. Килијан Мбапе учествуваше при постигнувањето на првиот и на третиот гол за ПСЖ.
https://www.youtube.com/watch?v=tIbwGUonP88
Во вториот меч од групата Б, Селтик славеше на теренот на Андерлехт со 3:0. Леи Грифитс во 38 минута, Патрик Робертс во 50 и Скот Синклер во третата од судиското екстра време беа творци на првиот гостински триумф на шкотскиот претставник во Европа по 17 натпревари.
Една од највозбудливите претстави во второто коло од А – Г групната половина во ЛШ, сепак, се одигра на „Ванда Метрополитано“ во Мадрид. Челзи со пресврт на крајот ги спакува и понесе трите бода за Лондон. Антоан Гризман обезбеди предност за тимот на Диего Симеоне во 40 минута по прецизниот удар од белата точка, но премиерниот настап на „јорганџиите“ на својот нов стадион во ЛШ наместо со хепиенд заврши со шок за домашните фанови. По израмнувачкиот погодок на Мората во 60 минута, погоди и Бачуаи во 94. за голема победа на „сините“ на менаџерот Антонио Конте во групата Ц.
https://www.youtube.com/watch?v=x1zGU1vDGxA
Рома, пак, во истата конкуренција го совлада Карабаг со 2:1. Стрелци за „волчицата“ на националниот стадион во Баку беа Костас Манолас во седмата минута и Един Џеко во 15., Педро Енрике во 28. го реализира единствениот за дебитантот во групната фаза во ЛШ.
Триумфален марш на Манчестер Ј. низ Москва, Барселона со автогол до три бода во Лисабон
Убедливи победи на Манчестер Ј. и на Базел во групата А. „Црвените ѓаволи“ го растурија системот на ЦСКА и славеа среде Москва со 4:1, а Базел со 5:0 ја декласира Бенфика.
Јувентус ја оправда фаворитската улога против Олимпијакос во групата Д, но „старата дама“ ги сочува бодовите со два гола во вториот дел. Грчкиот отпор во Торино го скршија Игуаин во 69 минута и Марио Манџукиќ во 80. Барселона го совлада Спортинг во Лисабон со 1:0 со автоголот на Коатес во 49 минута. Македонскиот репрезентативец Стефан Ристовски беше изземен како опција во официјалниот протокол на средбата.
Лига на шампиони, 2 коло
Група А
ЦСКА Москва – Манчестер јунајтед 1:4
Кучаев 90′ – Лукаку 4′, 27′, Марсијал 19′ (п), Мкитарјан 57′
Базел – Бенфика 5:0
Ланг 2′, Оберлин 20′, 69′, Ван Волфсвинкел 59′ (п), Риверос 76′
Табела: Манчестер јунајтед 6, Базел 3, ЦСКА Москва 3, Бенфика 0.
Идно коло (18 октомври): Бенфика – Манчестер јунајтед, ЦСКА Москва – Базел.
Група Б
ПСЖ – Баерн Минхен 3:0
Алвес 2′, Кавани 31′, Нејмар 63′
Андерлехт – Селтик 0:3
Грифитс 38′, Робертс 50′, Синклер 90’+3′
Табела: ПСЖ 6, Баерн Минхен 3, Селтик 3, Андерлехт 0.
Идно коло (18 октомври): Андерлехт – ПСЖ, Баерн Минхен – Селтик.
Група Ц
Атлетико Мадрид – Челзи 1:2
Гризман 40′ (п) – Мората 60′, Бачуаи 90’+4′
Карабаг – Рома 1:2
Педро Енрике 28′ – Манолас 7′, Џеко 15′
Табела: Челзи 6, Рома 4, Атлетико Мадрид 1, Карабаг 0.
Идно коло (18 октомври): Челзи – Рома, Карабаг – Атлетико Мадрид.
Група Д
Спортинг Лисабон – Барселона 0:1
Коатес 49′ (автогол)
Јувентус – Олимпијакос 2:0
Игуаин 69′, Манџукиќ 80′
Табела: Барселона 6, Спортинг Лисабон 3, Јувентус 3, Олимпијакос 0.
Идно коло (18 октомври): Барселона – Олимпијакос, Јувентус – Спортинг Лисабон.