Шест лица се уапсени за обидот за атентат на претседателот на Венецуела Николас Мадуро вчера , објави националната телевизија.
Уапсените се обвинети за “тероризам и атентат”, соопшти министерот за внатрешни работи, Нестор Реверол.
За еден од притворените имало потерница за неговата наводна улога во нападот во август 2017 година врз воена база во Валенсија.
Друг претходно бил апсен за време на протестите против владата во 2014 година. Реверол најави дека се можни и нови апсења.
Мадуро го преживеа нападот, откако неколку дронови полни со експлозив полетаа кон него за време на говорот на воената парада во Каракас. Според Мадуро зад овој напад стојат екстремно десничарски елементи и претседателот на Колумбија во заминување, Хуан Мануел Сантос.
Според Министерството за внатрешни работи напаѓачите користеле два дронови DJI M600, а на секој од нив имало по 1 килограм експлозив C-4.
Експлозивот може да предизвика оштетување во радиус од 50 метри. Едно од беспилотните летала прелета над местото каде што стоеше Мадуро, каде била немарата и да бидат активирани. Според полицијата, второто беспилотно летало паднало во станбена зграда каде што и експлодирало.
Инцидентот се случи додека Мадуро говореше на одбележувањето на 81-годишнината од венецуелската национална гарда.
Сето ова е регистрирано на преносот во живо од настанот на националната телевизија.
Мадуро се појави на националната телевизија неколку часа подоцна каде зборуваше за истрагата и апсењата.
Тој рече дека венецуелската политичка екстремна десница во соработка со колумбискиот претседател Сантос стојат зад нападот. Тој исто така ги обвини жителите на Венецуела кои живеат во САД.
-Прелиминарната истрага покажува дека многу од одговорните за нападот, финансиери и планери, живеат во САД во државата Флорида. Се надевам дека администрацијата на Трамп е подготвена да се бори против терористички групи кои вршат напади во мирни држави на нашиот континент, во овој случај Венецуела, рече Мадуро.
Венецуелската влада подолго време ја обвинува Колумбија за заговор за соборување на Мадуро, во соработка со екстремно десничарски елементи во Богота и Мајами.
Оваа недела претседателската функција во Колумбија ја преземе Иван Дуке.