Шест месеци условна казна доби и Јордан Ристевски, поранешен советник на ВМРО-ДПМНЕ, во општина Центар, кој призна вина како обвинет во случајот за „Насилството во општина Центар“.
Пресудата веднаш станува правосилна бидејќи обвинетиот се откажа од жалба до Апелација.
Поранешниот советник Ристески, пред судот ја призна вината како што рече без закани, притисоци и уцени, и вети дека во иднина нема да стори кривично дело.
Ова е втора пресуда за нарачаните шамари во Центар. Ристевски ја призна вината, откако истото го стори и советникот Томислав Лазаров, кој исто така доби условна казна од шест месеци.
Обвинителката Фатиме Фетаи во завршниот збор и точно ја опиша улогата која ја имале дел од обвинетите во овој случај.
-Локација од која извира идејата за настанот е од мозокот на Никола Груевски, а веднаш по него е послушникот Миле Јанакиески. Лазаров е еден од потикнувачите на извршителите на насилството, рече Фетаи.
Во овој предмет обвинети се уште 12 лица, меѓу кои и екс премиерот Никола Груевски и екс министерот Миле Јанакиески.