Ниту еден од ковид позитивните пациенти кај кои е изолиран делта сојот не е вакциниран за Ковид – 19, соопшти министерството за здравство. При епидемиолошките анкети со пациентите здравствените работници утврдиле дека никој од нив не примил ниту една доза вакцина.
– Од вкупниот број позитивни пациенти, кај кои е утврдено присуство на делта сој, само еден е во многу тешка состојба. Станува збор за пациент, кој 8-9 дена откако појавил симптоми на Ковид 19, одбивал да оди на лекар и бил во домашна изолација. Во моментов се вршат епидемиолошки анкети на останати членови од семејството на двајца од хоспитализираните пациенти, кои живееле во заедница и возможно е да се утврди и кај нив присуство на индијски сој на вирусот, соопштија од министерството за здравство.
Со делта сојот во земјава се евидентирани шест случаи, а за уште четворица се чекаат резултатите дали се носители на вирусот. Денеска еден случај е регистриран во Велес, а дргите два се евидентирани уште вчера во приватната клиника „Жан Митрев“.
– Во Лабораторијата за Гентика и Персонализирана Медицина при Клиничката болница Жан Митрев во Скопје во текот на вчерашниот ден беа идентификувани двајца пациенти позитивни за делта сојот на SARS-CoV-2 (B.1.617.2) со што и официјално беше потврдено дека делта сојот се шири во Македонија, соопштѕија од приватната клиника „Жан Митрев“.
Паралелно, министерството за здравство повикува на масовна вакциниција и уверува дека сите вакцини кои ги има кај нас се безбедни и ефикасни во заштитата од Ковид – 19.