Опасниот корона вирус ја зема шестата жртва, а досега се заразени 300 луѓе, јави „Би-Би-Си“. Кинеските здравствени власти ги предупредија надлежните на пониско ниво, да не го прикриваат ширењето на заразната болест.
Светската здравствена организација (СЗО) за утре(среда) свика вонреден состанок за да процени дали треба да се прогласи меѓународна вонредна состојба поради појавата на новиот вирус во Кина.
Агенцијата на ОН го најави состанокот откако се потврди дека корона вирусот се пренесува од човек на човек.
Комитетот за вонредни состојби на СЗО може да издаде препораки за здравствена политика и да повика на меѓународни мерки за објавување глобална вонредна состојба, заедничка соработка и финансирање во борба против вирусот.
Стручниот тим на Националната здравствена комисија на Кина потврди дека е регистриран пренос на новиот корона вирус од човек на човек, откако две лица од провинцијата Гуангдонг биле заразени преку контакт. Најмалку 15 лица, медицински персонал во Вухан, од каде што почна да се шири вирусот се заразени, а еден е во критична состојба.
Корона вирусот излезе од границите на Кина. Здравствените власти во Квинсленд стравуваат дека во Австралија има прв случај на човек заразен со смртоносниот корона вирус и дека заболениот е ставен под карантин.
Станува збор за маж кој неодамна се вратил од Кина со симптоми на респираторна болест. Властите ги чекаат резултатите од анализите, кои треба да утврдат дали заболениот е заразен со опасниот корона вирус, кој ги напаѓа белите дробови. Во Австралија е најголем број на туристи се од Кина, околу еден милион годишно.
Случаи на заразени со корона вирусот се идентификувани во Тајланд(два случаи), еден во Јапонија, еден во Јужна Кореја и еден во Тајван. Сите инфицирани неодамна се вратиле од Вухан.
Многу земји ги зајакнаа контролите над лицата што пристигнуваат од Кина. Најмалку три аеродроми во САД почнаа да ги прегледуваат патниците што пристигнуваат од тоа подрачје, на луѓето им мерат температура уште во авион или на аеродром.
Кинескиот претседател Си Џинпинг изјави дека Пекинг ќе го спречи ширењето на епидемијата предизвикана од коронавирусот.
– Животот и здравјето на луѓето треба да бидат приоритет и ширењето на епидемијата треба одлучно да се сузбие, изјави Си.
Светска здравствена организација (СЗО) предупреди на можноста од ширење на епидемија со оглед на тоа што голем број Кинези најавија патувања во земјата и во странство поради Кинеска Нова година.
Корона вирусот припаѓа на истата група како САРС (тежок акутен респираторен синдром) и МЕРС (блискоисточен респираторен синдром). Новиот вирус спаѓа во истиот тип корона вируси кои предизвикуваат тежок акутен респираторен синдром како САРС.
Во епидемијата на САРС во 2002 и 2003 година починаа речиси 800 луѓе.








