Градоначалникот на Скопје Петре Шилегов денеска потврди дека издал налог за да се почне постапка за дислоцирање на галиите од реката Вардар.

– Ги испитуваме позициите на сите три објекти и визави таа позиција ќе бидат донесени соодветни решенија. Галиите во Вардар се небезбедно решение за граѓаните на Скопје, потенцира Шилегов.

На новинарско прашање за состојбата со депонијата Дрисла и со шпекулациите дека таму се гори радиоактивен отпад, Шилегов побара трпение од скопјани и потсети дека  помалку од еден месец е на функцијата градоначалник.

– Во текот на вчерашниот ден кажав уште малку трпение како град и како институции, набргу ќе излеземе со целосна анализа за состојбата во Дрисла, рече Шилегов.

Вчера во интервју за ТВ 24, Шилегов рече дека постојат сериозни  индиции за огромна криминална активност и за сериозна кривична одговорност на многу лица со работењето на ,, Дрисла, севкупното работење, но и со загадувањето на Скопје, бидејќи има шпекулации дека има радиоактивен отпад и ова е дел на анализа на повеќе институции.