Градоначалникот Петре Шилегов, министерката за труд и социјална политика, Мила Царовска и заменик министерот за здравство, Арменд Арслани денеска во ЈЗУ „Универзитетска Клиника за Гинекологија и Акушерство – Скопје“ ги посетија првите бебиња – близнаци кои се родија во Новата 2020 година.
Близначиња, женско и машко, се првите бебиња што се родија во 2020 година во Скопје. Бебињата се родени на Универзитетската Клиника за гинекологија и акушерство во Скопје. Првото е женско, родено во една минута по полноќ, тешко е 2.360 грама и долго е 47 сантиметри, второто е машко, на свет дојде две минути подоцна, тешко е 1.760 грама и долго 46 сантиметри.
Мајка на близначињата е Снежана Рунтева, а братчето и сестричето ќе се викаат Габриел и Анастасија.
Градоначалникот Шилегов на мајката и семејството им честита за близначињата, посакувајќи им добро здравје и многу среќа. Тој на семејството, во име на Град Скопје, му додели паричен надоместок за близнаците и други пригодни подароци.