Шпаркасе Банка Македонија денеска преку соопштение информира дека досега немаат индикации и сознанија за вклученост на вработени лица од Банката во пријавените инциденти со сефовите во оваа банка. 

Шпаркасе реагира на веста што ја објави Алсат-М, повикувајќи се на неофицијални информации, што ја пренесе НОВА дека двајца странски државјани и еден државјанин на Македонија се осомничени за кражбата на сефови „Шпаркасе банка“.

-Покрај постапката која ја водат надлежните органи, случајот се истражува и од страна на секторот за внатрешна ревизија на Банката. Клиентите се на прво место и ги преземаме сите активности во насока на ефикасно разрешување на пријавените инциденти. Ја разбираме Вашата потреба за подетално да ја информирате јавноста, меѓутоа, приоритетен интерес на Банката е да ги заштити интересите на клиентите и да овозможи истрагата за објавените инциденти во сефовското работење да се одвива непречено, професионално и ефикасно. Од тие причини, во овој момент не можеме да Ви дадеме подетални информации за погоре споменатиот настан, се вели во соопштението од Банката.