САД 100 години го предводеа слободниот свет, а по победата на Доналд Трамп, Америка доброволно се одрече од таа улога, пишува денеска германскиот весник Шпигел, оценувајќи дека е време Европа и Ангела Меркел да ја пополнат таа празнина.
– Во јануари, кога Доналд Трамп ќе ја положи заклетвата како 45.американски претседател, американската ера ќе ја прослави „стогодишнината, но истовремено тоа ќе биде и нејзин погреб“, пишува весникот.
Шпигел констатира дека Америка долго време била ориентир за Запад, но ако Трампо владее онака како што ветил во текот на кампањата, земјата доброволно ќе се одрече од својата улога на лидер на слободниот свет, а тогаш доаѓа редот на Европа.
– Континентот треба да даде отпор на популизмот, со мудра комбинација на сериозно прифаќање на стравувањата и соочување со гневот, а притоа да не се ограничува слободата.
Крајно време е Европа да почне да придава значење на ЕУ, а шокот од победата на Трамп би можел да придонесе тоа конечно и да се случи, пишува Шпигел во текстот.
За жал, се наведува во текстот, Европа е во најлоша состојба во изминативе неколку децении. Британците ја напуштаат ЕУ, делумно од страв од слобода на останатите да се населат во Британија. Многу влади ги истакнуваат прашањата по кои постои поделба, а не оние кои ги зближуваат. Европските држави се оддалечуваат, констатра Шпигел.
– Што ќе се случи со Западот, со Европа и Германија, без САД како водечка сила? Германија е чедо на Западот, посебно на САД, особено благодарение на добродушноста на Ааерика, а сега е во состојба на длабок шок. Американскиот претседател секогаш истовремено бил и наш претседател, барем во извесна ссмисла, а Барак Обама беше достоен претседател на Западот. Сега ќе мора да се снајдеме без западно водство, пишува Шпигел.
Во текот на стогодишната заштитиничка и раководна сила на Западот, нејзините сојузници водеа релативно лагоден живот, можеа себе си да си дозволат луксуз без ентузијазам да ја следат европската идеја затоа што тука беа Американците.
Германскиот весник додава дека сега Европа веројатно ќе мора сама да се грижи за сопствената безбедност и тоа во време кога во нејзиното соседство се Владимир Путин, Реџп Таип Ердоган и Исламската држава.
– Западните лидери без Америка се соочени со монументални задачи. Германската канцеларка Ангела Меркел е претставничка на јака држава и има силни морални темели што ги покажа за време на бегалската криза. Таа не мора да биде Вудро Вилсон, но би требало да стане одлучен водач на Европа. Ако не биде тоа, тоа ќе значи дека не ги препознала знаците на времето, заклучува Шпигел.