Во споредба со првиот круг од локалните избори, кога имаше каква- таква раздвиженост, пред и во седиштето на ВМРО ДПМНЕ вечерва, по затворањето на гласачките места од вториот круг од гласањето, иако е се уште рано, владее штама.
Надвор нема буквално никој – ниту граѓани, ниту активисти, ниту некој од функцинерите. Дури и големиот видео бим на кој досега одеше програмата на телевизијата на Сеад Кочан ТВ Нова е исклучен.
Внатре се само новинарските екипи кои чекаат да се појави некој од партиските претставници. На прашањето на НОВАТВ кога се очекува прес конференција, од прес центарот на ВМРО ДПМНЕ изјавија дека не се знае.
Лидерот на ВМРО-ДПМНЕ Никола Груевски претходно денеска по гласањето обвини за, како што рече, недемократска атмосфера и системски закани и уцени врз граѓаните.
– Демократската атмосфера, за жал, во овој период не можеме да ја видиме. Колку што имаше нерегуларности во првиот круг на гласањето, тие уште повеќе се зајакнаа во вториот круг. Претежно се манифестираат во две форми: масовен поткуп на граѓаните како никогаш досега во Македонија и закани, притисоци и уцени врз луѓето, претежно кон наши активисти од страна на СДСМ, изјави Груевски по гласањето.
Според него, во минатото се случувале обиди за поткуп, но биле многу изолирани, многу ретки, многу мали…, а сега станува збор за масовен поткуп, што, како што рече, е под заштита на полицијата, контролирана од СДСМ.
– Луѓето отворено се уценуваат со губење работа, особено администрацијата, со кривични пријави, недобивање субвенции,… Тоа е масовно, организирано, системски. Како што поткупот е организиран масовно и системски, така и заканите, уцените, заплашувањата и притисоците се масовни и системски, рече Груевски, додавајќи дека и покрај се, ВМРО-ДПМНЕ нема да биде скршена со ова и дека нивната борба допрва почнува.