Златко Далиќ ја презеде фудбалската репрезентација на Хрватска на коло до крајот на квалификациите за Светското првенство во 2018 година. Триумфот над Украина на гости (0:2) беше препорака да остане на кормилото и за баражот со Грција, а по успешно одработените 180 минути ја зацементира својата позиција кај претседателот на хрватскиот фудбалски сојуз, Давор Шукер и речиси сигурно останува на клупата на „коцкестите“ и за завршниот турнир во Русија наредното лето.
„Подготвен сум за соочување со предизвикот. Што се однесува до мене, може да се договориме за една минута. Чест и гордост е да се биде на чело на хрватската фудбалска репрезентација. Верувам дека ќе добијам прилика да ја водам за првпат и на едно големо натпреварување“, порача Далиќ чија желба е останување на Дражен Ладиќ во неговиот стручен штаб.
Далиќ седна на националната клупа како замена за Анте Чачиќ кој доби отказ по поразот од Турција (0:1) и ремито со Финска (1:1) на домашен терен во финишот на мундијалскиот циклус. Укажаната доверба ја искористи на најдобар можен начин. Пред дебитантското селекторување во кариерата работеше како тренер на Славен Белупо, на Риека, на Хајдук, на Динамо Тирана и на неколку екипи во Саудиска Арабија.