„Мојот впечаток, и тоа е мој личен впечаток, е дека опозицијата води тактичка игра да ја стави владата во тешкотии. Но, на ниво на држава, независно дали сте во влада, или во опозиција, треба да се земе предвид интересот на земјата во целина. А главен интерес на државата е да се надминат пречките на патото кон членство во ЕУ и затоа сметам дека партиите треба внимателно да размислат за баланс меѓу државна одговорност и тактички чекори во односите влада-опозиција. Главната опозициска партија во земјава е дел од Европската народна партија. ЕПП пак го дели ставот на вашата Влада дека уставните измени се неопходни за напредок во ЕУ“, рече денес во Скопје поранешниот претседател на Европскиот парламент и актуелен претседател на фондацијата Фридрих Еберт, Мартин Шулц.
Шулц, кој пет години беше на чело на Европскиот парламент, го критикуваше односот на Брисел кон Северна Македонија, француското вето го нарече неоправдано и мотивирано од нивни домашни причини, и повика Унијата, по македонско-бугарскиот договор, да ги исполнува ветувањата.
И поранешната шефица на шведската дипломатија Ана Линде, образложувајќи дека нема пократок пат во тешките евроинтеграции, се надева на конструктивност од домашната опозиција.
„Зборуваме за уставните измени, кои сега сметам дека се важни. Сметам дека актуелниот премиер Димитар Ковачевски, поранешниот премиер Зоран Заев и поранешната министерка Радмила Шекеринска направија особено големи напори да ја донесат земјата во ситуацијата во која се наоѓа сега и искрено се надевам дека ќе има конструктивна опозиција, а не опозиција што само го отежнува патот на вашата земја за членство во ЕУ, зашто нема пократок пат“, порача таа.
Шулц и Линде денес беа гости на конференцијата на фондацијата Фридрих Еберт во Скопје.