Михаел Шумахер е во кома веќе десет дена по тешкиот пад на скијање во Франција. Лекарите и понатаму неговата состојба ја опишуваат како критична, но велат – стабилна. Сепак сеуште не се знае кога ќе можат да го разбудат од индуцирана кома.
Францускиот јавен обвинител и полициските инспектори утрово излегоа пред новинарите во Албервил со нови детали за несреќата.
Шумахер настрада три дена пред Нова година на скијање кога му помогнал на пријател кој бил во неволја, по што се изгубил на опасниот дел од стазата, а според наводите возел пребрзо и невнимателно. Полицијата ги истражува околностите за несреќата а за тоа им помага и снимката од камерата на кацигата на славниот Формула 1 шофер.
„Помеѓу лекарите постои конфузија за повредата на главата. Водејќи се по неа, тешко е да се прецизира брзината. За тоа ќе разговараме со стручните лица, но за истрагата не е важно воопшто со која брзина се движел“, изјави Патрик Квинси, францускиот јавен обвинител.
Тој и инспекторите додале дека стазата била означена според прописите, а скиите на Шумахер биле во добра состојба и не се причина за несреќата.
Наводно постои и друга снимка од мобилен на еден германски турист. Според пишувањата на „Дер Шпигл“, Германецот од Есен, ја снимал својата сопруга кога случајно „го фатил“ моментот кога паднал Шумахер. Според наводите, тој скијал со брзина од околу 20 километри на час.
Шумахер тешко се повреди удирајќи во карпа која се наоѓа во еден вид на „остров“ меѓу две скијачки патеки, едната црвена, друга сина, (означени се според нивната тежина) на десетина метри од нивното обележување.