Илиноис Нгоки Езике, директорката на американскиот Завод за јавно здравство во државата Илиноис денеска изјави дека дошло до значителен пораст на случаи на труење во последните два дена, откако американскиот претседател, Доналд Трамп, јавно праша дали може коронавирусот да се излечи со средства за дезинфекција.
Според неа едно лице побарало медицинска помош откако истурила детергент во синусите додека друго лице правело гаргара со мешавина од избелувач и течност за плакнење на устата.
„Вбризгување, конзумирање и шмркање средства за дезинфекција е опасно. Не советуваме да се прави тоа, може да биде смртоносно“, вели д-р Езике, пишува Си-Ен-Ен.
Трамп пред два дена на дневната конференција за коронавирус сугерираше дека со вбризгување средства за чистење како изопропилен алкохол во телото може да се убие корона вирусот, а предложи и зрачење на телото на болните со УВ зраци. Кажа дека тоа треба да се провери со лекарите, но дека нему му изгледа „интересно“.
Само ден подоцна тој рече дека неговите зборови биле саркастични и дека не сугерирал да се направат опасни активности по здравјето на луѓето. Иако очигледно разговараше со докторите кои беа со него на прес-конференцијата, тој сега вели дека всушност разговарал со новинарите и се шегувал.
„Јас, всушност, го поставив прашањето саркастично, до еден новинар исто како и вие. Сакав да видам што ќе се случи. Дезинфекцијата дејствува на рацете. И прашав новинар кој беше таму вчера. Претходно, моите лекари ми рекоа дека вирусот траел помеѓу 3 и 6 часа на тврди површини и умирал за помалку од една минута на сонце. И така, го поставив саркастичкото прашање пред новинарите за дезинфекција за внатрешна употреба“, рече Трамп.




