Најновите филмови на режисерите Стивен Содерберг, Роман Полански и Паоло Сорентино се дел од 19-те филмови кои годинава се во конкуренција за главната награда, Златна палма, на 66. филмски фестивал во Кан, кој ќе биде отворен во средината на мај.
Организаторите соопштија дека 1.858 филмови биле пријавени за главната натпреварувачка селекција. А критичарите оценуваат дека годинава на фестивалот ќе има силна конкуренција, со силни остварувања.
Меѓу фаворитите, во трката по Златната палма се „Behind the Candelabra“ на Стивен Содерберг во кој играат Мајкл Даглас и Мет Дејмон и „ Inside Llewyn Davis“ на браќата Џоел и Итан Коен.
Во главната конкуренција е и канадскиот филм „Grigris“, кинескиот „A Touch of Sin“, француските “Michael Kohlhaas”, “Jimmy P” и “La Vie d’Adele”
Тука се и „Only God Forgives“ во режија на данскиот режисер Николас Виндинг Рефин, холандскиот „Borgman“, „The Great Beauty“ на италијанскиот режисер Паоло Сорентино и „Nebraska“ на Александар Пеин.
Во конкуренција се и јапонските филмови „Straw Shield“ и “Soshite Chichi Ni Naru“, американскиот „The Immigrant“, иранскиот „ Le Passe“ и италијанскиот „ Un Chateau en Italie“.
Фестивалот ќе биде отворен на 15-ти мај со „Големиот Гетсби“ на австрискиот режисер Баз Лурман, каде главната улога ја толкува Леонардо ди Каприо.
Фестивалот ќе биде затворен на 26-ти мај со трилерот „Зулу“ во режија на Жером Сала во кој главните улоги ги толкуваат Орландо Блум и Форест Витакер.
Годинава жири-комисијата ќе ја предводи оскаровецот Стивен Спилберг, а претседател на жири-комисијата која ќе ги оценува делата во конкуренцијата „Извесен поглед“ е данскиот режисер Томас Винтерберг.