Ниту една политичка партија не вршела притисок врз Државниот завод за статистика околу тоа како да се спроведе пописот, тврди директорот на заводот, Апостол Симовски за Телевизијата 24.

– И власта и опозицијата дадоа поддршка на овој процес и тоа е добро. Таа политичка порака да се поддржи овој процес е апсолутно коректна. Она што професионално го работиме, е наша работа и никој не се обидел да се меша, рече Симовски.

Добиените податоци од пописот се користат само за статистички цели, до кои ниту една институција нема пристап до нив, уверува Симовски. А, за отпорот кон статистичката операција, тој вели дека критичната маса против пописот е минорна.

–  Во најголемиот дел од домаќинствата во дополнителен разговор прифаќаат да се попишат. Многу се ретки случаите каде некој одбива да се попише… Тие кои упорно одбиваат да се попишат, ќе сносат санкции согласно законот, рече Симовски.

Казната за оние кои одбиваат да се попишат се од 300 евра.

Првиот човек на Статистика очекува помал податок од последната успешна статистичка операција од 2002 година, но вели дека не сака да шпекулира.

– Да почекаме, имаме уште малку време да го завршиме пописот и да завршиме со обработката на податоци и да излеземе со официјални резултати. Има некој индиции дека може да биде 1,8 или 1,9, но да не избрзуваме со прогнози, рече Симовски.