Селекција на кандидатите за попишувачи е во тек и очекуваме да заврши до крајот на денот. Списоците ги проверуваме, податоците се внесуваат во базата и тоа ќе потрае – вели Симовски.
Во тек е селекција на кандидатите за попишувачи за претстојниот Попис 2021, кој треба да почне на 5 септември. Од пријавените 7.532 кандидати, треба да бидат одбрани околу 5.050 лица за реонски попишувачи.
Директорот на Државниот завод за статистика (ДЗС), Апостол Симовски вели:
– Селекција на кандидатите за попишувачи е во тек и очекуваме да заврши до крајот на денот. Списоците ги проверуваме, податоците се внесуваат во базата и тоа ќе потрае – вели Симовски.
Како што објавивме вчера, од пријавените 7.532 кандидати за попишувачи, вакцинирани се речиси половина – 3.251 лица. А од другите, вкупно 4.281 невакцинирани кандидати, 2.435 прифаќаат да се вакцинираат, доколку тоа биде организирано.
– И тоа го договоривме со Министерството за здравство – на лице место, односно во училиштата каде ќе се врши обуката, ќе биде организирана и вакцинацијата на оние кандидати кои се заинтересирани и кои ќе ја поминат селекцијата за попишувач. Тридневната обука на попишувачите почнува в недела – вели Симовски.
Училиштата по обуките ќе бидат дезинфицирани и подготвени за почеток на учебната година.
(Љ.Б.)