Синдикатот на културата денеска преку соопштение упати неколку барања до министерствата за култура, за информатичко општество и администрација и за финансии кои се однесуваат на донесување нов Закон за култура, за пролонгирасе на рокот (31.03.2018 г.) за изготвување на систематизации, за доделувања на решенија за распределување на вработените и за одобрување средства за порамнување на платите во различните дејности на културата и за унапредувањето на вработените кои стекнале стручни и уметнички звања.
-Во последниве месеци имаме нова власт која се уште нема променето ништо по однос на законите, а намерата на власта за имплементација на одредбите од некои закони, само би ги продлабочила нашите проблеми во работниот однос. Затоа, како синдикат, сметаме дека е наша обврска и должност јавно да ги артикулираме нашите проблеми и да упатиме барања до министерствата под чија надлежност припаѓаме, велат од Синдикатот.
-Донесувањето на нов Закон за култура, за уметниците и културни работници е од немерлива важност и претставува ставање крај на досегашниот Закон кој нас не стави во ригидна административна рамка, кој ја ограничи слободата на творење, кој претставува пример за легална закана од страна на работодавецот и отвора простор партиски притисок и манипулација. Донесувањето на нов закон ќе овозможи и донесување на нов колективен договор во кој ќе се решат моменталните проблеми од работниот однос, велат од Синдикатот реагирајќи до Министерството за култура, при што исто така изразуваат разочарување од Националната стратегија во делот за театарска дејност.
Од Синдикатот за култура од Министерство за информатичко општество и администрација да го пролонгира рокот (31.03.2018 г.) за изготвување на систематизации, за доделувања на решенија за распределување на вработените.
-Систематизациите се изготвувани селективно, забележани се законски пропусти како измислени работни места, противзаконски услови за напредок во кариерата и неадекватни распоредувања на вработените од едно на друго работно место. Во оваа насока, бараме министерството да испрати допис до директорите на институциите со директива да бидат изготвени нови систематизации во кои ќе бидат вклучени синдикалните претставници и носителите на дејноста. Потоа, да се направат соодветни промени во каталогот на работни места, а вработените да бидат распоредени на работни места соодветни на нивното знаење и стручност, истакнуваат од Синдикатот.
Од Министерството за финансии се бара одобрување на средства за порамнување на платите во различните дејности на културата и за унапредувањето на вработените кои стекнале стручни и уметнички звања.
-Вработените во институциите од културата речиси десет години се спречени да бидат исплатени за својот стручен и уметнички напредок кој е формално потврден од Министерството за култура, но не е финансиски валоризиран поради ставот на Министерството за финансии за забрана на вертикални унапредувања. Па така, вработените кои добиле решенија за повисоко стручно звање или уметнотоичка категорија, добиваат одговор од Министерството за култура дека платите ќе им бидат регулирани според новите звања и категории откако Министерството за финансии ќе одобри средства за истото, без да биде наведен рок, се вели во соооштението.
Од Министерството за култура најавија одговор на барањата на Синдикатот.