Енормното загадување во Скопје и во други градови продолжува и утрово. Според мерењата на страницата на Министерството за животна средина, утрово најзагадено е во Кавадарци каде во подолг временски интервал се регистрирани 237 мг ПМ10 честички, потоа Лисиче со 173, Битола со 171, ако се знае дека дозволенитата граница на ПМ10 честички на метар кубен воздух е 50 микрограми.
Во сите скопски општини синоќа загадувањето беше на многу високо ниво. Мерните станици покажуваат дека концентрации на ПМ 10 честичките во текот на ноќта надминувале 100 микрограми, а достигнале и до 400 микрограми на метар кубен.
Во Карпош, Лисиче и кај Ректорат концентрациите на ПМ10 честичките од осум часот до 14 се движеле околу максимално дозволената граница од 50 микрограми на метар кубен, по што почнуваат да се зголемуваат.
Најзагадено било во Лисиче. Регистрирани се концентрации од 405 микрограми на метар кубен во 23 часот. Загаден воздухот во Лисиче, според мерењата, имало во континуитет од вчера од 17 часот до утрово во осум часот.
Од 18 часот па се до утрово загаден воздухот е и кај Ректоратот. Концентрациите се движеле од 124 до 310 микрограми на метар кубен.
На мерната станица во Карпош најзагаден воздухот бил од 18 часот до седум часот утрово, при што од 20 до 22 часот се забележани највисоките концентрации на оваа мерна станица кои се движат над 200 микрограми. Најзагадено било во во 20 и 21 часот со 235, односно 240 микрограми на метар кубен ПМ10 честички.
Загаден воздухот бил и во Битола со највисоки регистрирани концентрации од 325 микрограми на метар кубен, Тетово со 375 микрограми, Кавадарци со 416 микрограми и Куманово со 391 микрограми на метар кубен.
Во Скопје од денеска како дел од мерките за намалување на загадувањето почнува акција за чистење на улиците, а од викендот има бесплатен автобуски превоз до Средно Водно и забрана за возила на Водно.