Сириските демократски сили поддржани од коалицијата предводена од САД прогласија победа над Исламската држава во Рака, град на северот на Сирија кој оваа екстремистичка група го прогласи за своја престолнина.

Портпаролот и командант на сисирските демократски сили Талал Сило на прес конференција истакна дека Рака е ослободена од екстремистите и дека власта официјално е предадена на локалниот совет.

-Го победивме тероризмот, изјави Сило.

Прес конференцијата е одржана  на градскиот спортски стадион кој екстремистите од ИД го претворија во голем затвор каде ги држеа во заложништво и ги малтретираа противниците.

Сило ја повика меѓународната заедница и хуманитарните организации да помогнат за обнова на градот.

Светските агенции оценуваат дека падот на Рака претставува голем пораз за Исламската држава која од минатата година полека ја губи територијата која порано ја контролираше.

Исламската држава ја освои Рака во јануари 2014 и градот го претвори во, како што оценуваат аналитичарите, епицентар на своето брутално владеење.