Веќе подолго време во сирискиот регион на Источна Гута не е доставена храна, додека болниците се систематски напаѓани и бомбардирани.
Од поранешните 27 медицински установи во градот, шест веќе не се функционални, вели Мохамед Кутуб, портпарол на сириско-американско лекарско друштво за арапскиот тв канал на Дојче Веле. Голем број лекари и медицински персонал настрадаа во нападите.
Особено во последниве недели гранатирањето на градот кој е под контрола на џихадистите е интензивирано. За само неколку дена, според проценките на хуманитарците во регионот, убиени се околу 500 цивили, меѓу нив 120 деца, а над 2400 лица се повредени. Околу 400.000 лица се „заробени“ во Источна Гута.
Децата се најмногу погодени од целата ситуација, бидејќи немаат ни топла облека за да се заштитат од студот. Во регионот на Источна Гута температурите во текот на ноќта паѓаат до четири степени.
Катастрофална е ситуацијата и за лекарите. Лекарка од организацијата „Лекари без граници” вели дека таа и колегите речиси и не можат да се движат низ регионот, дури и со јасно обележани амбулантни возила. Исто така таа вели дека се и исцрпени.
„Исцрпени сме од постојаното бомбардирање, кое трае цела недела без прекин. Не сме спиеле практично со денови. Дури и ако некој дремне, тоа се прави на смени. Поголемиот дел од колегите мора да се будни, бидејќи постојано се носат повредени”, вели таа.
Од почетокот на судирите во Сирија во 2011 година, регионот Источна Гута е центар на отпорот против владата на Асад. Во 2013 година, режимот ги нападна тогашните опозициски групи со отровен гас. Но, противниците на Асад успеаја да се задржат и оттогаш ги градат своите позиции. Како што е карактеристично за Сирија, и во Источна Гута отпорот во текот на годините ги менуваше идеолошките насоки. Ако првично бил посветен на демократски и либерални идеали, под зголемениот воен притисок сè повеќе се отвора кон исламистички и џихадистички групи. Тие сега доминираат во отпорот – исто така идеолошки.