Специјалното јавно обвинителство поднесе предлог до Основниот суд Скопје 1 за определување на мерка претпазливост – одземање патни исправи за две осомничени лица во врска со истрагата за предметот „Тендери“, соопшти СЈО.
За истите две лица е побарана и мерка претпазливост – еднаш неделно, секој вторник во 10 часот да се јавуваат кај определено службено лице во Судот.
– Во текот на вчерашниот ден до Основниот суд Скопје 1 – Скопје, а во врска со истрагата во предметот „Тендери“ поднесен е предлог за определување на мерки за претпазливост за две осомничени лица, со кои е побарано од Судот осомничените лица да се јавуваат еднаш неделно – секој вторник во 10:00 часот кај определено службено лице во Основниот суд Скопје 1 Скопје.
Воедно, за двете осомничени лица побарано е определување и на мерка претпазливост одземање на патна исправа, поради постоење на околности кои упатуваат на опасност од бегство, се вели во соопштението од СЈО.
СЈО вчера започна истрага за два случаи, “Топ лик“ и „Тендери“ за склучување договори меѓу министерства и приватни фирми за злоупотреба на службената положба и нанесување штета на државниот буџет.
Случајот „Тендери“ е за склучување договор меѓу Министерството за култура и ГТД „Бетон Штип“ од Штип за извршување завршни градежни работи на Музејот на ВМРО во периодот од 2001 до 2013 година, во вредност од 54.501.336 денари. Првоосмничено е раководното лиде во Министерството и тројца членови на тамошната комисија за јавни набавки.
Министерката за култура Елизабета Канческа Милеска која во тој период го раководи ова Министерство вчера на прес конференција рече дека случајот е „чист како солза“, а обвинувањата од СЈО ги нарече „рекла казала“.