По објавата на медиумите дека пет и пол години нелегално ја земала пензијата од нејзината почината мајка за што ја чека и судски процес за долгови кон државата, кандидатката за европратеник од редовите на СИРИЗА, Мирсини Лоизу, се повлече од трката.
Според пишувањата на весниците „Филелефтерос“ и „Прото тема“, Лоизу пред две години била осудена на две години условна затворска казна од атинскиот суд затоа што во периодот од септември во 2007 година до јули во 2012 година, односно 69 месеци, бесправно ја користела пензијата на нејзината мајка која починала во 2007 година.
Паралелно, во мај годинава, кусо пред евроизборите, според грчките весници, Лоизу ја очекува и судски процес за долгови кон државата.
Сега веќе поранешната кандидатка за европратеник на СИРИЗА во писмото за нејзината оставка напиша дека некои медиуми, во обид да остават впечаток, „измешале два различни случаја“.
„И двата случаи ќе беа скандалозни доколку се обидев да скријам или да избегнам некаква обврска. Напротив, бев доследна во секој процес и секогаш сум ѝ на располагање на грчката држава, пишува Лоизу.
Во однос на пензијата на нејзината мајка вели дека не било нејзина грешка, бидејќи смртта веднаш ја пријавила во надлежните служби и додава дека причината зошто пензијата се исплаќала е поврзана со бирократски процедури.