Синоќа по шести пат во Градскиот парк во Скопје, се одржа традиционалната мултимедијална Манифестација „Види музика, слушни слика, добиј книга“ во организација на Македонската филхармонија и Младинскиот Културен Центар-Скопје.
Во градскиот парк во Скопје атмосферата ја вжештија евергрини од „Абба“, „Би џис“ и Мајкл Џексон кои во еден класичен аранжман ги отсвири Македонската филхармонија, а диригирани од палката на исклучителниот Тимоти Редмонд од Велика Британија.
Изборот на музиката падна врз повеќе незаборавни музички нумери, светски диско хитови од ’70-те и ’80-те години, преработени за голем симфониски оркестар и музички бенд, добро познати на сите генерации, а наменети за одлично музичко доживување на сите консументи.
Спектаклот го дополнија ликовните перформанси на академските сликари, браќата Емил и Тони Шулајковски, коишто сликаа на платна со огромни димензии: 10 х 3 метри, со повеќе големи четки, десетици литри маслени и акварелни бои, што несомнено, како и секоја година, претставуваше вистинско ликовно празнување за вљубениците во ликовната уметност.
Годинава, изборот за 20 000 примероци-подарок книги е збирката песни „Еден ден ќе се сретнеме“ на реномираниот македонски поет Никола Маџиров.
Книгата е избор од досега необјавени песни на Маџиров и од песни од поетските збирки: „Заклучени во градот“, „Некаде никаде“, „Асфалт, но небо“ и „Преместен камен“. Мотивот на корицата на збирката песни „Еден ден ќе се сретнеме“ е позајмен од делото „Рибарче“, 1957, на починатиот академски сликар, Иван Велков.