Во рамките на ПОП АП АКТО фестивалот кој годинава се одржува во четири града низ Македонија, организаторите одлучија за една поинаква, критичка туристичка тура низ центарот на градот Скопје во однос на проектот „Скопје 2014“.
Туристички водич пред гостите на фестивалот, а воедно отворена за јавноста беше активистот Никола Наумовски, кој пред присутните зборуваше за аномалиите на овој проект и контроверзностите со кои на главниот град на Македонија му се даде нов изглед.
Наумовски вели се одлучиле на оваа „Кич Тура“ бидејќи останатите водичи не ја покажувале другата страна на „Скопје 2014“.
– Осетивме дека има простор за да се каже она што треба да се каже за „Скопје 2014“, она што останатите туристички водичи не го кажуваат. Ја кажуваат само златната и сребрената страна на овој проект. Затоа што „Скопје 2014“ е многу повеќе уништување на градот отколку градење. Да се направи ваква тура не е ништо повеќе туку кажување на вистината, вели Наумовски.
Оние кои учествуваа во оваа тура низ градот, каде што Наумовски говореше за кичот на поставување споменици од различни епохи, едни до други, се чудеа на податоците и не можеа а да не чукнат со прсти на стиропорните фасади на новоизградените згради за потребите на државните институции.
За Корадо Џемини, фотограф од Италија, Скопје 2014 е пандан на Лас Вегас. Тој вели најстрашно е што со него се извртува културата на земјава.
– Најважното нешто што го видов денеска е хаосот кој го прават овде. Ја кријат вашата култура. Мешаат работи бесмислено и мислам дека ова е голем проблем бидејќи ја бришат меморијата и критичкиот дух на луѓето. Ова е како во Лас Вегас. Првото нешто што ми дојде на памет кога шетав низ градот беше „Каде е казиното?“. Ова е како во Лас Вегас, насекаде ставено по нешто без смисла и се работи за визуелно задоволство но направено без размислување, вели тој.
Освен оваа кич тура низ градот Скопје, ПОП АП АКТО фестивалот, кој трае од 23 до 28 септември, се случуваа и се предвидени работилници, предавања и разни проекции со учесници од различни држави.