Фестивалот ќе биде отворен вечерва во 21 часот во Мултимедијалниот центар „Мала станица“ во Скопје со изложбата на фотографии „The Vlatko Stefanovski Experience“
Големиот филмскиот композитор Збигњев Прајснер е добитник на наградата за животно дело на 10. издание на Фестивалот на музики документарни филмови „Скопје синема сити“. Фестивалот ќе биде отворен вечерва во 21 часот во Мултимедијалнио центар „Мала станица“ во Скопје со зложбата на фотографии „The Vlatko Stefanovski Experience“. Филмската програма ќе се одржи од 1 до 4 јули во Кинотека на Македонија. Земја во фокус на фестивалот е Полска, каде ќе бидат прикажани два филма на Грегор Брзозович, кој и ќе биде гостин на фестивалот.
Изложбата „The Vlatko Stefanovski Experience“ претставува дел од историјата на нашиот познат гитарист видена низ призмата на четворица реномирани фотографи како Стефан Рајхл, Ангел Ситновски, Огнен Ацевски и Немања Ѓорѓевиќ, а ќе бидат вклучени и архивите на музичкиот историчар Тошо Филиповски и Владимир Мандичевски – Манде. Како куриозитет ќе бидат изложени и звучниците Legendary на Теохаров аудио, кои се дизајнирани заедно со Стефановски.
– За време на својата повеќедецениска работа, Влатко Стефановски има остварено бројни изданија кои се индикатори за неговата сестраност и богата кариера. Само со „Леб и сол“ има остварено 14 изданија, неговата солистичка кариера брои 15 изданија, а бројот на соработки со музичари од различни поднебја и бројот на концерти е немерлив и несогледлив – вели Ненад Георгиевски од „Скопје синема сити“.
Покрај студиото како креативно место или лабораторија за создавање музика, концертната сцена е главното место или главната адреса за целосно доживување на оваа музика. Музиката е волшебна работа која, освен што нèзабавува, создава и многу други ефекти – концертите се местото каде што се доживува музиката непосредно и автентично под светлата на рефлекторите, поттикнувајќи нè да се соочиме со нашите најдлабоки и скриени емоции.
– Постои еден албум на Боб Дилан што носи интересен наслов, „Together Through Life“ или „Заедно низ животот“, и не можам да се сетам на период во животот кога Влатко не бил присутен со својата музика и концертни настапи. Како новинар, сум следел бројни концерти во Скопје, во Белград, во Нови Сад, во Стариград Пакленица, и во Њујорк, и овој уметник секогаш носел магија на сцената, што е и главната мотивација за оваа изложба. „The Vlatko Stefanovski Experience“ не е само изложба, туку е сведоштво за големото влијание кое Стефановски го има постигнато во светот на музиката. Таа сведочи за неговото патешествие од млад гитарист до културна икона. Со изложбата ù се оддава почит на една музичка икона чија музика ги надминува сите граници и жанрови и култури – вели Георгиевски.
Филмскиот дел во Кинотеката на Македонија ќе биде отворен со „Карлос“, филм за големиот гитарист Карлос Сантана, додека вториот ден ќе бидат прикажани филмовите „Ајде да се изгубиме“ за џез трубачот Чет Бејкер и „Џо Страмер: Иднината е ненапишана“.
Во периодот помеѓу 1985 и 1996 година, почнувајќи од филмот „No End“, Прајснер бил еден од најблиските соработници на Кишловски и заедно работеле на 17 филма. Меѓу познатите филмови што изнедриле исто толку позната музика се мини серијалот „Decalogue“, филмовите „А Short Film About Killing“, „A Short Film About Love“, „The Double Life of Veronica“, трилогијата „Three Colours“. Нивната соработка не била само насочена кон светот на филмовите туку и кон концерти. „Requiem for my Friend“, кој е посветен на Кишловски, првично бил замислен како концертно дело со поинаква природа, кое требало да се изведува на подиуми во европските метрополи. Всушност, Кишловски и требало да го режира. Но со неговата прерана смрт во 1996 година, природата на ова дело се менува. Поделено на два дела, насловени како „Requiem“ и „Life“, ова е најемотивното дело во опусот на Прајснер.
Покрај Кишловски, Прајснер е автор на музика за десетици филмови, меѓу кои се „Damage“, „Aberdeen“, „The Secret Garden“, „Man of God“. Неговата карактеристична лиричност и емотивност довела и до многубројни соработки, како со Дејвид Гилмор од „Пинк Флојд“ и со Лиса Жерар од „Dead Can Dance“.
Последната вечер е посветена на македонските филмови и ќе бидат прикажани филмовите „Лука“ на Ице Виранов и „Тале Огненовски“ на Благојче Трајковски.