Скотланд Јард и експерти на британската полиција за хемиска, биолошка и нуклеарна контаминација, денеска истражуваат во домот на рускиот олигарх Борис Березовски, откако вчера јавноста беше известена за неговата смрт. Тие испитаат дали има присуство на супстанци и материјали кои би можеле да ја предизвикаат неочекуваната смрт на политичкиот дисидент, кој во 2000 година пребега од Русија во Велика Британија.
Засега нема соопштение за тоа дали е откриено нешто сомнително, но екипата на Скотланд Јард се уште ја третира смртта на Березовски како „необјаснета“.
67- годишниот Борис Березовски, вчера, беше најден мртов од членовите на неговото обезбедување. Откако била известена, полицијата го презела мртвото тело на олигархот за детално испитување.
Во јавноста се шпекулира дека станува збор за инфаркт, но и дека е можно да се работи за самоубиство.
Березовски побегна од Русија во Лондон, по судирот со претседателот Владимир Путин кој со помош на олигархот успеа да влезе во Кремљ. Во Велика Британија стана најостриот критичар на Путин и на неговата власт, па беше означен како најпознатиот дисидент во посткомунисточка Русија.
Полицијата не ја отфрла можноста за срцев удар, но Березовски беше голем пријател на убиениот дисидент Александар Литвиненко, кој беше отруен со радиоактивниот полониум 212, па се претпоставува дека затоа Скотланд Јард одлучи да трага и по можноста, причина за смрта на Березовски да биде и присуството на некој вид контаминација во неговата куќа.