Кшиштоф Пендерецки, еден од најценетите живи композитори денес, ќе гостува на 53. издание на фестивалот „Охридско лето“. Славниот композитор и диригент ќе го води концертот на Македонската филхармонија закажан за 3 август, на кој ќе бидат изведени неколку негови дела, јавува „Нова Македонија“.
Оваа информацијата сѐ уште не ја открива организаторот на фестивалот, но во Македонската филхармонија била истакната табла за активностите во рамки на „Охридско лето“, на која е објавена комплетната програма и стои дека музичарите во Охрид ќе свират дела од славниот композитор, кој ќе го води концертот.
Информацијата ја потврдува и директорка на Македонската филхармонија, Маја Чаначевиќ.
„Концертот ќе биде тематски и ќе се свири избор од опусот на Пендерецки. Пробите за концертот ќе ги води неговиот асистент-диригент, а Пендерецки ќе дојде директно во Охрид за концертот што е закажан за 3 август“, вели Чаначевиќ.
Пендерецки е полски композитор и диригент и еден од најголемите живи композитори на денешницата. Роден е во 1933 година во Дебица, Полска. Во неговиот композиторски опус се собрани голем број фази од музичкото творештво на 20 и 21 век, најмногу од кој било современ композитор денес.