Словенечките власти го примија дописот за меѓународната потерница против Митја Валиќ, која преку Еуропол ја распиша Македонија, но велат дека нема основ словенечкиот државјанин да и биде предаден на земјава зашто не сме членка на ЕУ.
Валиќ, според македонските власти, е замешан во аферата за перење на околу 1 милион евра, пари во сопственост на словенечки „Меркатор“, а кои од компанијата се земени на име на посредување на кипарска фирма со македонската држава, на кој директор беше Валиќ и која е во сопственост на „Меркатор“, за потоа Словенците да можат да го раскинат договорот претходно склучен за купување земјиште.
Македонската полиција тврди дека договорот претходно бил раскинат и немало потреба од посредување и наплата за таква услуга. Заради ова, полицијата презеде акција под кодно име „Агент“ во која беа уапсени шест лица, меѓу кои и поранешниот директор на ДБК, Слободан Богоевски, како и адвокатите Владо Пешликовски и Васко Томановиќ. Полицијата извести и дека земените пари се поделени меѓу лицата замешани во аферата. На 19-ти април, на овие три лица и на уште двајца други им беше одреден 30-дневен привтор, додека едно лице е пуштено да се брани од слобода.
И покрај приемот на меѓународната потреница, словенечката полиција нема преземено ништо за апсењето на Валиќ.
– Со оглед на тоа што Република Македонија не е членка на Европската унија, Словенија не може да ѝ израчува свои државјани. Ако се покаже дека казнивото дејство, за кое го бараат македонските органи, важи за казниво и кај нас, Македонија може прогонот да ѝ го отстапи на словенечката полиција – изјави за љубљански „Финанце“ претставничката за односи со јавност во генералната полициска управа во Љубљана, Весна Дроле.
Валиќ, пак, во меѓувреме го има напуштено „Меркатор“ и ја врши функцијата директор во Директоратот за инвестиции во тамошното Министерство за образование, наука и технологија.
– За тоа не знам ништо, затоа немам што да коментирам – вели Валиќ за „Финанце“ и додава дека, ако е потребно, ќе соработува со органите на прогонот. Тој повторува дека својата поранешна функција во „Меркатор“ ја вршел во склад со законот.
Пред две недели Валиќ рече дека земјиштето е купено пред тој да стапи на функција во Македонија, како и дека купопродажбата е ревидирана од надворешна ревизорска куќа, чиј извештај е доставен до управата на компанијата.
Љубљанско „Дело“, пак, тогаш извести како од неофицијални извори дознава дека апсењата во овој случај се локална македонска работа и дека „Меркатор“ во нив е колатерална штета, но тоа не значи дека компанијата не била оштетена.
„Меркатор“ пак, тогаш објасни дека за оваа истрага не знаат ништо и дека не се официјално известени од никого .Тие додаваат дека во 2009 година купиле земјиште со големина од 10.971 метар квадратен од македонското Министерство за транспорт и врски, како и дека на почетокот од 2012 се одлучиле да се повлечат од македонскиот пазар.