Обвинителството за организиран криминал и корупција бара Судот да забрани работни активности на осомничените професори во акцијата Еразмус, за, како што велат оттаму да се превенираат состојби што можат да го попречат нормалното водење на кривичната постапка.
-Покрај истражната постапка, забележано е дека обвинетите продолжуваат да ги извршуваат своите работни активности во рамките на Економскиот факултет во Скопје и притоа се во секојдневен контакт со студенти, а со тоа и со оштетените и жртвите во кривичната постапка што се води. Со оглед на тоа што кривичните дела за кои се води постапка се поврзани како со извршувањето на нивните работни активности, така и со студентите и со меѓусебната комуникација на факултетот, јавниот обвинител цени дека со судска одлука на обвинетите треба да им се забрани да ги извршуваат работните активности до правосилното завршување на постапката, се вели во соопштението на Обвинителството.
За предметот „Еразмус” , Основното јавно обвинителство за гонење на организиран криминал и корупција од јуни оваа година постапувајќи по кривичната пријава поднесена од Министерството за внатрешни работи – Единица за корупција, спроведуваше истражна постапка против шест лица, меѓу кои професори на Економскиот факултет при УКИМ, еден демонстратор и еден управител на бифе во универзитетскиот комплекс.
Осомничените биле следени две години со посебни истражни мерки, а дел од сведоците се и студенти.
Двајца од обвинетите сториле кривично дело – Примање поткуп, едно лице кривично дело – Примање поткуп и кривично дело – Примање награда за противзаконито влијание , две лица дека сториле кривично дело – Злоупотреба на службена положба и овластување и едно лице за кривично дело – Давање поткуп.
Тогаш Основниот суд Скопје 1- Скопје со Решение на обвинетите им изрече мерки на претпазливост со кои се стекнаа со обврска повремено да се јавуваат на определено службено лице и кај надлежен државен орган и им беа одземени патните исправи за преминување на државната граница.
Акцијата на УКИМ со силно полициско обезбедување на 6. јуни годинава траеше со часови. Полицијата вршеше претрес во кабинетите, а професорот Бобек Шуклев беше задржан на паркинг просторот на кампусот, а претрес се правеше и во неговиот автомобил.
Во полициската акција која се случуваше на Универзитетот „Свети Кирил и Методиј“ реагираа дел од професорите, кои велат дека со прекумерно вооружените сили се руши Автономијата на Универзитетот.
Тогаш од обвинителството посочија дека согласно Законот за високо образование , кога полицијата се соочува со затекнато лице на извршување на кривично дело или треба да спречат такво дело може да влезе на просторот на Универзитетот.