Професорите на Економскиот факултет во Скопје, Славе Ристевски и Драге Јанев се осудени на две и пол години затвор, а нивниот колега Бобек Шуклев доби две години за случајот „Еразмус”, односно за земање пари од студенти за полагање на испити. Демонстраторот Драган Денковски е осуден на условна казна од две години, а професорот Стојан Дебарлиев е ослободен од обвинението.
Судечкиот совет денеска, покрај затворските казни, на осудените им изрече и мерка забрана за вршење дејност од 10 години. Обвинителството ги товареше обвинетите дека во повеќе наврати во текот на 2015 и 2016 година, искористувајќи ја својата положба сториле кривични дела.
Обвинетите професори Бобек Шуклев и Славе Ристески се товарат за примање поткуп и примање награда за противзаконито влијание, Стојан Дебарлиев за злоупотреба на службената положба и овластување, а демонстраторот Драган Денковски за давање поткуп.
Основното Јавно Обвинителство (ОЈО) за гонење на организиран криминал и корупција поднесе обвинителен акт против шест лица во декември во 2016 година.
„Обвинителството ги товари обвинетите врз основа на докази што го потврдуваат основаното сомневање дека во повеќе наврати во подолг временски период, односно во текот на 2015 и 2016 година како лица вработени на Економскиот факултет при Универзитетот „Св. Кирил и Методиј“ – Скопје, искористувајќи ја својата положба сториле кривични дела. Обвинетите Б.Ш и С.Р се товарат за сторено кривично дело – примање поткуп, лицето Д.Ј. се обвинува дека сторило кривично дело – примање поткуп и примање награда за противзаконито влијание. Обвинетите Љ.Ј. и С.Д. се товарат за сторено кривично дело – злоупотреба на службената положба и овластување. Со обвинителниот акт се обвинува и лицето Д.Д. за сторени три кривични дела – давање поткуп“, стоеше во соопштението од ОЈО.