Операционите сали на Клиниката за ортопедија и денес останаа затворени иако пристигнале набавките со неопходните лекови. НОВА дознава дека причина за откажување на операциите е што економскиот директор Алекандар Стаменковиќ не ги потпишал нарачките за лекови и медицински потрошен материјал поради што се затворени операционите сали, а пет клиники останаа без лекови.

Иако нарачките биле навремено доставени до него од страна на медицинскиот директор Реџеп Селмани и раководителите, тој не ги потпишал, по што ситуацијата стана критична на сите пет клиники при се закануваше опасност да бидат откажани операциите на сите хируршки клиники. Ваквата ситуација драматично с е одразила  и на КАРИЛ кај најтешко болните каде што снемало тубуси за апаратите за вештачко дишење.

НОВА дојде до Записникот од состанокот на Стручниот колегиум  каде се дискутирало за алармантната состојба со лекови и медицински потрошен материјал, а на состанокот не бил присутен Стаменковиќ.

Во Записникот меѓу другото се вели дека „ситуацијата е алармантна од аспект на снабденост со медицински потрошен материја и лекови и ако веднаш не се преземат итни мерки за набавка постои опасност да бидат откажани операциите и на другите хируршки клиники поради недостаток од тубуси и друг потрошен материјал на анестезија“.

Стаменковиќ пак, вчера за НОВА кратко во СМС порака одговори дека операционите сали работат редовно согласно со оперативната програма.

„Ве известувам дека нема застој во работа и дека сите постапки за јавни набавки течат согласно планот за јавни набавки. Оперативната програма се одвива редовно и без застој“, изјави Стаменковиќ.

Откако НОВА објави дека Клиниката за ортопедија ги затвори операционите сали и ги откажа сите операции, тој ги потпишал набавките, а од клиниката не известија дека таму попладнето стигнале неопходните лекови. Но, хирурзите велат дека и денеска операционите сали се затворени и не се прават операции. Лекарите сметаат дека новата набавка ниту оддалеку не ги задоволува потребите бидејќи за да може да оперираат потребни се вештачки колкови, колена, протези, штрафови и се она што е  потребно за да се оперираат пациенти.

Ситуацијата дополнително се комплицира бидејќи секојдневно пристигнуваат нови пациенти кои се здобиле со скршеници на неисчистените улици со снегот. Лекарите велат дека на ортопедија нема листа за чекање бидејќи постојано кубират со медицински потрошен материјал, а тендерот од мината година никако да се реализира. Од тие причини пациентите за операција чекаат со месеци, а некои и цела година.