Published: Wednesday, January 19, 2022 16:38
Посетата на бугарскиот премиер Кирил Петков вчера, наметна една нова реторика на Република Бугарија што може да се толкува како прв чекор кон решение на спорот со нашата земја. Претседателот на тамошната влада не го криеше задоволството и денеска во Народното собрание, кога пред новинарите повтори дека вчерашаната посета на Северна Македонија и неговиот македонски колега Димитар Ковачевски е „огромен успех“.
Двајцата премиери вчера направија прв голем чекор – нашата држава испрати вербална нота до ОН дека нема територијална претензија кон Република Бугарија, од друга страна пак Бугарија прифати скратеното име на нашата држава Северна Македонија да го користи подеднакво, како и долгото име Република Северна Македонија со што се обврза дека нема да ја кочи употребата на тоа име во меѓународните процеси.
„За оваа нота е разговарано, разговарано, преговарано, и само затоа што направивме нов пристап, тоа го добивме. Тука треба да се разбере дека вчера беше огромен успех“ -рече Петков денеска во Нардното собрание на Република Бугарија. Петков и Ковачевски покажаа дека пријателствата во меѓународните односи се стекнуваат преку совпаѓање на интересите на државите.
Двајцата премиери најавија дека работните групи кои ги формираат ќе бидат концентрирани во области на економијата, инфраструктурата, трговијата, иновациите, евроинтеграциите и во областа на образованието и културата. Со тоа се испрати јасна порака дека сегашноста ни укажува на други приоритети, кои значат многу повеќе за граѓаните, за нивната иднина посебно за младите.
„Тоа што го постигнавме на првата средба јасно укажува дека двете страни решивме, добрососедството да има поинаква дефиниција од тоа што било досега“ – изјави Петков.
Бугарскиот и макеоднскиот премиер, вчера на пресконференцијата меѓусебно се обраќаа на име што беше дополнителен показател за нивата желба да ги обединат граѓаните околу стратегиските цели на Бугарија и Северна Македонија.
Несомнено е дека Петков влева надеж дека од исток ќе имаме политика втемелена на пристојност, европски вредности. Бугарскиот премиер уште пред да го добие мандатот вети дека- идната Влада на Бугарија ќе се залага за силно добрососедство, но и дека не смее историјата да биде критериум на патот на Македонија кон ЕУ, што всушност се поистоветува и со официјалната политика на нашата Влада.
Редакција НоваТВ