Сметката на Институтот за јавно здравје во Министерството за здравство е блокирана од извршители, а последната плата ја земале во мај, дознава НОВА од свои извори во оваа институција. Ситуацијата е алармантна бидејќи не можат да ги извршуваат тековните обврски, да набавуваат материјали, нема пари ниту за гориво во службените возила. Се трошат и залихите на реагенси, така што неизвесно е кога ќе престанат превентивните програми, односно превентивните прегледи и испитувања.
Институтот е највисока научна и превентивна институција во државата. Таа е продолжена рака на Министерството за здравство и во неа се вршат испитувања и се вршат анализи од областа на епидемиологијата, вирусологијата, ХИВ/СИДА и други болести,се испитува храна, воздух, вода(како што беше случај со Дојранско езеро)се испитува ниво на радијација, се вршат санитарни и прегледи, доктрини, проекти.
Според податоците до кои дојде НОВА, во моментот на сметката нема ниту денар, а Институтот е во загуба од половина милион евра. Во моментот оваа институција вкупно должи 1 милион и 790 илјади евра, од кои 1 милион и 715 илјади евра треба веднаш да се платат. Сметката со извршител ја блокирала фирмата „Биотек“ на кои за реагенси Институтот им должел 260 000 евра. Нашите извори велат дека 245 000 евра биле наплатени во јануари,а остатокот од 44 000 евра ги наплатиле во средата, додека неплатени, доспеани има уште 130 000 евра. На Институтот пак, му должат еден и пол милон евра.
Оваа институција која се наоѓа само спрат погоре од кабинетот на министерот за здравство е голем должник на ЕВН( околу 200 000 евра), на Авицена( 300 000 евра за реагенси), како и на Заеднички служби во Клиничкиот блок каде за парно греење должат околу 278 000 евра. За ваквата состојба е известена Владата и министерот за здравство Никола Тодоров, но од таму се уште не добиле никаков одговор.
Информациите ги потврди и директорот Шабан Мемети, кој рече дека последното писмо до премерот Емил Димитриев за финансиска поддршка е испратено пред една недела.
„Да, точно е тоа, а за ваквата ситуација информиран е министерот за здравство и Владата. Чекаме одговор“, кратко одговори Мемети.
Всушност, Владата за ваквата состојба била информирана уште во април годинава, кога било испратено првото барање за финансиска поддршка.
Иако, Институтот има сопствени извори на средства, по кој основ од разни должници треба да наплати еден и пол милион евра, тие се средства не се доволни за да се покријат сите трошоци, а особено програмските активности, велат во Институтот. Приватните лица кои вршеле испитување на храна и други работи не ги плаќаат редовно доставените фактури, дополнуваат нашите извори.
Во Институтот велат дека приходите од буџетот се во постојано опаѓање и нивниот износ не е доволен ниту за основните материјални трошоци на програмските активности,( чиј обем е зголемен). Згора на се институцијата од свои средства ги покрива платите на вработените за овие активности иако треба да бидат финансирани од буџетот на државата.
Во Институтот за јавно здравје во моментот се вработени 167, а од септември со вработување на лицата со договор на дело, според Законот за трансформација на Владата, вкупната бројка ќе изнесува 183 вработени. Трпението на вработените е при крај, што може да се рефлектира и на тековното работење.
Од Министерството за здравство до објавување на текстот не добивме никаков одговор. Но, според неофицијални информации, таму се дигнала голема врева по испраќањето на прашањата од НОВА.
Од Владата информираат дека за оваа состојба со Институтот за јавно здравје побарале мислење од Министерствата за финансии и здравство.
„Согласно законските и деловнички прописи побарано е да се произнесат Министерствата за здравство и финансии и откога ќе бидат доставени нивните мислења, Владата ќе се произнесе за оваа материја“, се вели во одговорот од Владата.