„Спијте мирно интернетот е забранет“, „Уста пуста затворете да не каже оти боли“, „Смрт на фашизмот слобода на изразувањето“, беа дел од паролите со кои активистите на Фронтот за слободно изразување по повод Денот на победата над фашизмот протестираа пред Делегацијата на Европската Унија во Скопје.
Настанот беше инициран со цел да се спротистави на обидот да се воведе цензура со донесување Закон за медиуми во Македонија.
Притоа, Фронтот за слобода на изразувањето потсетуваат дека Уставот на Република Македонија на граѓаните им гарантира слобода на уверувањето, совеста, мислата и јавното изразување на мислата.
Сепак, познато е дека Европската комисија не е институцијата која од Македонија бара донесување на Закон за медиуми. Сега, кога одлуката да се донесе Закон е тука, ЕК се надева дека тој закон ќе биде добар, велат европски дипломати за НОВА, кои се соочени со критиките дека токму Брисел е причината поради која закон се донесува.
Законските придобивки за медиуми во ЕУ се однесуваат исклучиво на аудио-визуелните медиуми. Улогата на ЕУ во медиумската сфера се ограничува на фиксирање на правила за одбрана на јавниот интерес како што се пазарот и лојалната конкуренција во оваа област и или областа на преминување од аналогна во дигитална технологија. ЕУ има своја директива за аудио-визуелни медиуми и Македонија треба да ја преземе.