Режисерот Антонио Митриќевски, својот трет по ред игран филм „Деца на сонцето“ ќе почне да го снима во средината на јуни на Преспанско Езеро. Тој денеска претстави дел од екипата од филмот, кој ќе се работи по сценарио на Гордан Михиќ, а ќе го снима 36 работни дена во Ресен, Отешево и Претор, во Битола и Скопје, а веројатно и во Црна Гора
Младиот актер од Битола, Кире Ѓоревски, кој дипломирал во Бугарија ќе ја игра главната машка улога, а Ивана Павлаковиќ, студентка на ФДУ, женската улога, улогите на љубовниот пар Марко и Ангела во едно типично македонско, односно балканско современо семејство, кое треба да го рефлектира актуелниот животен миг не само овде, туку и во светот.
Познатите македонски актери Владо Јовановски, Милица Стојанова и Ѓорѓи Јолевски изразија задоволство од сценариото во филмот во кој ќе играат и Мето Јовановски, Ацо Дуковски, Данчо Чевревски, Билјана Таневска, Камка Тоциновски, Мартин Мирчевски, Сашко Коцев.