Неколку илјади лица синоќа повторно се собраа на плоштадот Таксим, каде полицијата употреби водени топови, солзавец, гумени куршуми и палки за растурање на демонстрантите.
Додека полицајците во линија се движеа кон учесниците на протестите, демонстрантите почнаа да фрлаат црвени каранфили кон нив и скандираа „Полицијо, не го предавај својот народ“.
Синоќешниот протестен собир беше организиран една недела по полициската акција во која сите демонстранти беа отстранети од паркот Гези во Таксим.
Пред да започне полициската акција протестот траеше два часа, за време на кои демонстрантите извкуваа антивладини пароли и бараа оставка од премиерот Реџеп Тајип Ердоган.
Протести синоќа се одржаа и во турскиот главен град Анкара, каде полицијата исто така употреби слозавец и водени топови за разбивање на двете групи демонстранти, кои од различни делови на градот се упатија кон централниот градски полштад.
Премиерот Ердоган на митинг на негови приврзаници во градот Самсун обвини дека учесниците на антивладините собири се жртви на подмолен план.
– Младите станаа жртва на таквиот подмолен план. Што требаше да прави полицијата? Дали тие места требаше да останат окупирани?, запраша Ердоган, нагласувајќи дека полицијата си ја извршила својата должност.
Ердоган направи и паралела меѓу протестите во Турција и Бразил, обвинувајќи дека зад случувањата во двете земји стои ист центар на моќта.