Повеќе од три декади, граѓаните без оглед на етничката припадност, политичарите без оглед на нивната идеолошка провиниенција, како и граѓанските организации со најразлични експертизи и можности за делување можат да се согласат само околу еден став: Полноправното членство во Европската Унија и во европското семејство на народи е единствениот пат кон подобра иднина! Проектот „Дијалог со граѓанските организации – Платформа за структурно учество во ЕУ-интеграциите“, според многу параметри и резултати во изминатите три години се покажа како уникатна активност која значително ќе придонесе тој став кој не обединува сите, конечно да стане реалност. За трите години од работењето на овој проект е изработен и краток документарен филм во кој зборуваат важни чинители од истиот и претставени се клучните наоди и заклучоци од работењето.
На платформата www.dijalogkoneu.mk, 307 граѓански организации се вмрежија со цел добивање пристап до информации околу процесот за пристапување кон ЕУ. Секој граѓанин имаше и има можност да дознае многу повеќе за тоа што значи, суштинско и структурно учество на граѓанското општество. Секој граѓанин преку прегледувањето на основните информации и цели на овој проект ќе може да делува и да знае дека е особено важен дел од нашите реформски процеси во земјава. Можеби најважното, да научи како и каде може да се вклучи во промените и реформите кои веќе се спроведуваат и ќе бидат спроведувани за време на пристапните преговори.
Како клучни актери во активностите се етаблираните граѓански огранизации како Фондација Отворено општество – Македонија, Реактор – Истражување во акција, Центарот за граѓански комуникации и Евротинк – Центарот за европски стратегии. Бројни општествено влијателни поединци јавно и во неколку наврати ја искажаа суштинската придобивка од овој проект за нашата демократска клима особено во вакви значајни периоди.